බලියේ උපත

 බලි යන පදයෙහි අරුත දේව යක්ෂාදීන්ට දෙනු ලබන පිදේනිය, යාගය ශාන්තිකර්ම වලදී අඹනු ලබන රූප යනුවෙන් දැක්විය හැකිය. බලි යාගය සම්බන්ධයෙන්ද අනෙකුත් ශාන්තිකර්මයන්හිදී මෙන් ඊට සම්බන්ධ උපත් කතා ඇත. ඒවායින් වඩාත් ප්‍රචලිත උපත් කතා දෙකක් මතු දැක්වෙයි.

''ලෝකයේ ප්‍රථම රාජ්‍ය පාලකයා වූ මහා සම්මත රජතුමා තමාගේ ඇඟ මතට සර්පයෙක් වැටෙනු සිහියෙන් දැක එය කෙරෙහි බියට පත්වී රෝගාතුර විය. මේ සඳහා කොතෙක් ප්‍රතිකාර කළත් රෝගය සුව වූයේ නැත. මේ බව පවසා සිහින අරුත විමසූ කල ඔවුන් ප්‍රකාශ කළේ මහා සම්මත රජතුමාට ග්‍රහ දෝෂයක් වැළඳී ඇති බවත් ඒ වෙනුවෙන් ග්‍රහයින් සඳහා බලි යාගයක් පැවැත්විය යුතු බවත්ය. එහිදී බොහෝ දෙනා එක්වී බලි තනා පේ කර මහා සම්මත රජු වෙනුවෙන් ග්‍රහ දෙවියන් උදෙසා බලි යාග ශාන්තිකර්මයක් කරන ලද්දෙන් රජුට සුවපත් විය.''

අනෙකුත් කතාවෙන් කියවෙන්නේ ලිච්ඡවී නුවර ලිච්ඡවී කුමාරයෙකු හා සම්බන්ධ පුවතකි.''එක් කලෙක විශාල නම් වූ නුවර ලිච්ඡවී නම් රජ පරපුරෙහි එක් රජ කුමාරයෙකු තමන්ගේ පිරිවර සමග ජල ස්නානය සඳහා යනුයේ එක්තරා විලකට බැස සිත් සේ ජල ක්‍රීඩා කරමින් සිටින්නේ එකී විල අසබඩ නුග රුකක සිටී වෘක්ෂයට අධිගෘහිත යක්ෂයා කෙරෙහි කිසිදු ආකාරයක ගරුසරුවක් දැක්වීමක් නොකළේය. මෙයින් කෝපයට පත් එම යක්ෂයා එම කුමරුවන් ස්නානය කරමින් සිටියදීම ක්ලන්තයට පත් කළේය. කළ යුත්තේ කුමක්දැයි නොදැන වික්ෂිප්තභාවයට පත් වූ කුමරුගේ සහචරයෝ සිතට නැගෙන සිතුවිලි අනුව කටයුතු කරන්නේ කැලයෙන් මල් නෙළා ගෙනවූත් ආයුබෝ වේවා කියමින් කුමරු මතට විසි කළහ. එයින් තරමක සුවයක් ලැබූ කුමරු පිරිස සමග ආපසු මාලිගයට යන්නට තරම් ප්‍රමාණවත් කාය ශක්තියක් ලද්දේය. මෙම පුවත ඇසූ පිය රජතුමා වේදය දත් බමුණන‍ෙ ගෙන්වා ඒ පිළිබඳ විමසූ කළ කාල කේන්ද්‍රයට අනුව ගණනය කර බලන්නේ මේ නම් යක්ෂ දෝෂයකැයි නිගමනය කර අසූ එක් ගැබකින් යුත් මල් බලියක් සාදා එය යකුට පුද දෙන ලෙස උපදෙස් දුන්හ. මාලිගාවේ යාගයක් කොට බලිය පොකුණට කැප කරන ලදින් කුමාරයා සුවපත් විය.'' බලියාග මෙසේ උපත ලද අතර ප්‍රථම කොට පළමුවන ලද්දා වූ මල් බලය සහ වැලි බලය එය වේ යැයි ජනශ්‍රුතියේ කියවේ. 

බලි වර්ග පිළිබඳ සටහනක් සමඟින් පසුව හමුවෙමු.

(තොරතුරු , ගුරුවරු හා පොත්පත් ඇසුරිනි. අඩුපාඩු ඇත්නම් සදහන් කරන්න)

ප්‍රධාන මූලාශ්‍රයන්

දිසානායක මුදියන්සේ: සිංහල නර්තන කලාව: ඇස් ගොඩගේ සහ ප්‍රකාශකයෝ: කොළඹ 10; 1995

ඩබ්.ඒ.එම්.එස්.එන්.ජයවර්ධන

විශේෂවේදි ප්‍රථම වසර 

ජන සන්නිවේදන අධ්‍යයන අංශය

කැලණිය විශ්වවිද්‍යාලය